الحلقة الثالثة
(طبعا عارفين ان الحسناء فتكات على وش شبكة وعاملة عروسة بقى )
اوضة فتكات ........النور مطفى وعبد الحليم بيغنى جانا الهوا جانا وفتكات قاعدة هيمانة وماسكة الموبيل يمكن عريس الغفلة يتصل بس ده برضه مايهزش فى فتكات الجبارة شعرة
فتكات:مااااااااااماااااااااا
الام:ايه يا بت رعبتينى ربنا ينتقم منك
فتكات:هو زعيم التتار مش ناوى يلبس دبل ويشبكنى رسمى بقى ولا هيفضل داخل خارج عليناكده زى الدبانة
الام:هههههههههه يقطعك يا موكوسة اوام هتموتى على الواد مش ده اللى كان كوخة وريحته زيت قلية
فتكات:لالالالا انتى دماغك راحت فين يا ام فتكات انا بس عاوزة ارتاح منكم مش حبا فى المنيل عبد المتجلى ده
(بتحاول تدارى مشاعرها ناحيته احسن تبان ضعيفة ولا حاجة اصلها مفترية شوية )
الام:خلاص اهمدى بقى هو اتفق مع ابوكى يلبسك الشبكة يوم الجمعة الجاية على الضيق كده
فتكات:يومه اسود زى كف ايده سى عبد المتجلى المزحلق بتاع بنزين ورا يا اسطى
بقى انا اتشبك على الضيق وكمان من غير ما اختار شبكتى......عن اذنك يا ماما انا هتصرف
الام:ربنا يستر عليك يا بنى وتطلع سليم من تحت ايدها
تررررن تررررررررن
(فتكات ضحت برصيد الموبيل وطلبته )
عبد المتجلى
يفتح عليها) أفتح الكابوت يا ابن المتضايقة وشوف الزبون وريحه
فتكات: نعم يا اخويا
عبد المتجلى:الوووو لا يا شكمان قلبى مش انتا يا جميل
فتكات:احترم نفسك يا موتور احلامى
عبد المتجلى:ههههههههه والله عسل يا كوكو
فتكات:طب سيب عشة الفراخ اللى انتا فيها دى وركز معايا بقى عشان ما اقلبهاش عليك
عبد المتجلى:خير يا فتكات انا زعلتك فى حاجة؟
فتكات:هو انتا تقدر يا سبعى
بص بقى يا أما انزل انا وانتا نختار الشبكة وبلاش حماتى تديك فى حقن تحت الجلد يا أما تنسانى يا عبودى للابد اهىء اهىء اهىء اهىء انا اعصابى تعبانة ومحدش حاسس (فتكات بتعيط!!!!!!!!)
عبد المتجلى:طيب وحياتى عندك لو كان ليا عندك خاطر...... ما تعيطيش يا فتاكة قلبى
فتكات
هو عامل فيها انغام ولا ايه بس كويس البصلة جابت نتيجة ) المهم يا عبده قلت ايه؟( خلصنى بقى صحيح رغاى زى امك بهية المستخبية)
عبد المتجلى:لالالا انا هشوف الموضوع ده مهما كان ده حقك ودى شبكتك برضه وهنجيبها سوا يا كوكو ولا تزعل يا جميل
فتكات:طب يا عوعو انا هسيبك بقى عشان اتخنقت وما تنساش تشحنلى الموبيل مش هصرف عليك من اولها
عبد المتجلى:من عنيا الجوز وايدى اللوز.......يا محلول جلوكوز
فتكات
يخرب بيت ملافظك) تسلم ايدك يا عبده وما تنساش تغسلها قبل ما تاكل بدل ما تتسم من الهباب بتاع العربيات ومالحش اجيب حتى دبلة خشب وابقى ارملة
عبد المتجلى:ههههه سكر والله يلا خلى بالك من نفسك سلام
فتكات (تقفل السكة معاه)وتروح تفرح والدتها وتقولها اعملى حسابك هنروح نشترى الشبكة بكرة
الام:اروبة زى اللى خلفك ياعينى عليك يا عبد المتجلى انتى لو مش بنتى كنت قلتله اصرف نظر يابنى وشوفلك واحدة تانية
(اشتروا الشبكة وفتكات لبستها الحمد لله واليوم عدى على خير من غير اى خساير وفتكات كانت زى الحمل الوديع ما هى العروسة بقى وبذكائها اشترت كل اللى نفسها فيه بالرغم من ان ام عبد المتجلى كانت هتتشل من كتر المصاريف اللى صرفتها وحطت فتكات فى دماغها خلاص)
عبد المتجلى :احمممم عمى بمناسبة اليوم اللى زى القشطة ده لو ممكن يعنى اخد فتكات اعشيها بعد اذنك
الاب
وهو مجعوص اوى وفارد نفسه على الكرسى وعامل ديك رومى )والله يا عبده يا بنى انا معنديش بنات تخرج مع واحد غريب ....هو ده اللى عندى
الام:يوه يا متولى ماهى بقت خطيبته يا حج
فتكات
عليا النعمة ان ما رضيت يا متولى هشغل السخان عليك مية بتغلى وانتا فى الحمام )وتبتسم لابوها ابتسامة صفرا وهاين عليها تديله بالبوكس
عبد المتجلى
ينظر لحناطة اخو فتكات وهو قاعد زى برميل الطرشى وهاجم على علبة الشيكولاتا وقضى عليها ) ايه رايك يا عم متولى ناخد الامور حناطة معانا واهو يتعشى معانا انا شايفه خاسس كده وما بياكلش
حناطة:هييييه هتعشى .......خلينى اخرج مع ابيه عبده يا بابا
الام:خلاص بقى يا متولى ورحمة المرحومة امك ما تكسف عبد المتجلى
(واتنهد ابو فتكات وسكت شوية)
عبد المتجلى
مااااااشى يا متولى بيه ورحمة امك بكرة اتجوزها واخليك تشوفها مرة فى العيد الصغير ومرة فى العيد الكبير)
الاب
بكل تناكة)هاااااااااا طيب عشان خاطر حناطة ما يزعلش واكسر بخاطره روحوا اتعشوا بس ماتتأخروش
فتكات:تبتسم اوى وتبص لعبد المتجلى وهى فى منتهى السعادة (اظاهر انها حبيته بحق وحقيقى)
.............المهم عبد المتجلى واقف على باب الشقة هو وفتكات وامها مستنين اللورد حناطة عقبال ما يتشيك ويمسح لحوسة الشيكولاتا اللى مغطية وشه المنتفخ من كتر الحشر عمال على بطال
الاب
بشويش وماسك ودن حناطة)افهم يا جذمة يا ابو مخ عجالى انتا تمشى فى وسطهم وما تسبش ايد اختك واوعى الواد عبد المتجلى يمشى جمبها لو فكر يمسك ايدها عضه واجرى كأنك بتلغ حتة لحمة وعايزك تغتت وترزل عليه عشان يحرم يقول اخرجها تانى ........يلا غور من وشى تتك نيلة وانتا شبه امك
حناطة
متنح ومبلم ومدلدل رقبته وبيسمع الوصايا العشر من ابوه) ما تقلقش يا بابا انتا ما خلفتش الا حناطة اعتبر نفسك باعت اسد معاهم........بس انا اخاف فتكات تضربنى؟
الاب:امشى بس يلا بسرعة وما تخفش هى عاملة فيها فاتن حمامة النهاردة ومش هتضربك قدام المحروس (عبد المتجلى وفتكات وحناطة نزلوا من البيت واتمشوا على الكورنيش شوية وحناطة عامل زى حرس الحدود وعبد المتجلى هاين عليه يربطه فى ماسورة ويحدفه فى النيل هههههههههه)
عبد المتجلى:ها مبسوطة يا فتكات؟
فتكات:تبص لحناطة وتقول لعبد المتجلى اة اوى هتطق من الانبساط يا عبده
عبد المتجلى:المهم اننا مع بعض يا كاكا قلبى
فتكات:كاكا قلبك!!!!!ده دلع ده ........طيب تسلملى يا زعيم التتار
صحيح يا عبده ما فكرتش تحلق المقشة اللى سدة مناخيرك دى قبل كده.......ده حتى غلط على التنفس لاحسن تموت فطصان ولا حاجة
عبد المتجلى:لالالالالالالالا عمرى ده انا اموت بحسرتى (ويبصلها ويبتسم فى حين ان الاخ حناطة ملهى فى كيس الفيشار اللى جابهوله عبده عشان يرتاح من رزالته) ده شياكة يا فتوكة عشان ابقى شبه اللى اسمه يحيى ده يا لموسة قلبى
فتكات:اتلم يا عبد المتجلى بدل ما اخد حناطة واروح وخليك بقى حب فى شنبك يا بتاع لميس انتا
عبد المتجلى:ورحمة ابويا ورحمة ابويا كمان مرة انتا بتغير عليا يا جميل
فتكات
لاقت ان الموضوع هيقلب رومانسية وهى طبعا بميت راجل ....اسد يعنى) كشرت وقالتله :هتعشينا ولا اخد الواد وامشى واخليك تجرى ورايا والناس تتلم واقولهم بيعاكسى
وتاكل علقة تنسيك اسم المرحوم ابوك
عبد المتجلى
بمنتهى الاذبهلال)ايه يا فتكات قلبتيها اخبار حوادث ليه كده .......يلا ياستى نتعشى انا مش مستغنى عن عمرى
فتكات
رجالة ما تجيش الا بالسك)
(وعبد المتجلى اختار مطعم شيك اخر حاجة عشان خاطر عيون الساحرة فتكات متولى ودخلوا المطعم والغلبان عبد المتجلى بيرسم فى خياله اول عشا رومانسى زى ما بيشوف فى الافلام)